نص القصيدة
الحرم يا رسول الله الحرم يا رسول الله
خيفان جيت عندك قاصد الحرم يا رسول الله
خيفان جيت عندك قاصد يا صاحب الشفاعة الامجد
خوفي يرزلتني نتمرمد يوم الوقوف عند الله
عاري عليك يا محمد عار العبد على مولاه
عاري عليك يا بلقاسم يا صاحب اللواء والخاتم
راني مع فعالي نادم ما صمت باش نلاقي الله
ما تبت ما قريت اللازم ابليس غرني بهواه
ابليس غرني شيطاني في شبكة الذنوب ارماني
ضيعت في الغرور زماني والشيب للعذار اطماه
ما فقت به حتى كساني راسي بغير مال اشتراه
ضيعت في الغرور شبابي ما فقت حتى كساني شيبي
واليوم خفت يظهر عيبي وجميع ما فعلته نزاه
و ما كتب على ربي لابد كلنه نلقاه
يوم الممات ووفاء اجلي لابد نلتقي باعمالي
في القبر كيف يكون سؤال راس المشوم يا ما قوماه
ربي برحمته يغفر لي فضله كثير نترجاه
صلوا على الرسول الهادي عين الوجود محمد
تاج الكرام سيد اسيادي وسيد خلق الله
مداح نمدحك بانشادي حتى نصير نلقى الله
مداح نمدح العدناني بالقلب والعقل واللسان
مولوع به طول زماني ذكره في خاطري ما احلاه
احلى من العسل في لساني مدح النبي رسول الله
مدح الرسول فيه كرام ويزيد في القلوب نعايم
ازكى الصلاة عليه والسلام والثناء والرضى على مرضاه
اغفر لسامعين هذا النظام والوالدين ومن رياه
محمد ابن امسايب مداحك على الناس يفتخر بمقدارك
في الخلد درني جوارك يا سعد من خدم مولاه
سبحان ربنا اللي نصرك واعطاك الفضل والجاه
اعطاك الفضل والرحمة يا ولد امنة وحليمة
سعدت بك هذه الأمة شانك رفيع عند الله
في ساعة يوم القيامة هذا الشاعر لا تنساه
الحرم يا رسول الله خيفان جيت عندك قاصد
الحرم يا حبيب الله